সূর্যনমস্কার শ্লোক এবং মন্ত্র

.. সূর্যোপনিষত্ ..

অথর্ববেদীয সামান্যোপনিষত্ .

সূদিতস্বাতিরিক্তারিসূরিনন্দাত্মভাবিতম্ .
সূর্যনারাযণাকারং নৌমি চিত্সূর্যবৈভবম্ ..

ॐ ভদ্রং কর্ণেভিঃ শ্রুণুযাম দেবাঃ . ভদ্রং
পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাংসস্তনূভির্ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..

হরিঃ ॐ অথ সূর্যাথর্বাঙ্গিরসং ব্যাখ্যাস্যামঃ .
ব্রহ্মা ঋষিঃ . গাযত্রী ছন্দঃ . আদিত্যো দেবতা .
হংসঃ সোঽহমগ্নিনারাযণযুক্তং বীজম্ . হৃল্লেখা শক্তিঃ .
বিযদাদিসর্গসংযুক্তং কীলকম্ .
চতুর্বিধপুরুষার্থসিদ্ধ্যর্থে বিনিযোগঃ .
ষট্স্বরারূঢেন বীজেন ষডঙ্গং রক্তাম্বুজসংস্থিতম্ .
সপ্তাশ্বরথিনং হিরণ্যবর্ণং চতুর্ভুজং
পদ্মদ্বযাভযবরদহস্তং কালচক্রপ্রণেতারং
শ্রীসূর্যনারাযণং য এবং বেদ স বৈ ব্রাহ্মণঃ .
ॐ ভূর্ভুবঃসুবঃ . ॐ তত্সবিতুর্বরেণ্যং ভর্গো দেবস্য
ধীমহি . ধিযো যো নঃ প্রচোদযাত্ .
সূর্য আত্মা জগতস্তস্থুষশ্চ . সূর্যাদ্বৈ খল্বিমানি
ভূতানি জাযন্তে .
সূর্যাদ্যজ্ঞঃ পর্জন্যোঽন্নমাত্মা নমস্ত আদিত্য .
ত্বমেব প্রত্যক্ষং কর্মকর্তাসি . ত্বমেব প্রত্যক্ষং ব্রহ্মাসি .
ত্বমেব প্রত্যক্ষং বিষ্ণুরসি .
ত্বমেব প্রত্যক্ষং রুদ্রোঽসি . ত্বমেব প্রত্যক্ষমৃগসি .
ত্বমেব প্রত্যক্ষং যজুরসি .
ত্বমেব প্রত্যক্ষং সামাসি . ত্বমেব প্রত্যক্ষমথর্বাসি .
ত্বমেব সর্বং ছন্দোঽসি .
আদিত্যাদ্বাযুর্জাযতে . আদিত্যাদ্ভূমির্জাযতে . আদিত্যাদাপো
জাযন্তে . আদিত্যাজ্জ্যোতির্জাযতে .
আদিত্যাদ্ব্যোম দিশো জাযন্তে . আদিত্যাদ্দেবা জাযন্তে .
আদিত্যাদ্বেদা জাযন্তে .
আদিত্যো বা এষ এতন্মণ্ডলং তপতি . অসাবাদিত্যো ব্রহ্ম .
আদিত্যোঽন্তঃকরণমনোবুদ্ধিচিত্তাহঙ্কারাঃ . আদিত্যো বৈ
ব্যানঃ সমানোদানোঽপানঃ প্রাণঃ .
আদিত্যো বৈ শ্রোত্রত্বক্চক্ষূরসনঘ্রাণাঃ . আদিত্যো বৈ
বাক্পাণিপাদপাযূপস্থাঃ .
আদিত্যো বৈ শব্দস্পর্শরূপরসগন্ধাঃ . আদিত্যো বৈ
বচনাদানাগমনবিসর্গানন্দাঃ .
আনন্দমযো জ্ঞানমযো বিজ্ঞানানময আদিত্যঃ . নমো মিত্রায
ভানবে মৃত্যোর্মা পাহি .
ভ্রাজিষ্ণবে বিশ্বহেতবে নমঃ . সূর্যাদ্ভবন্তি ভূতানি
সূর্যেণ পালিতানি তু .
সূর্যে লযং প্রাপ্নুবন্তি যঃ সূর্যঃ সোঽহমেব চ . চক্ষুর্নো
দেবঃ সবিতা চক্ষুর্ন উত পর্বতঃ .
চক্ষুর্ধাতা দধাতু নঃ . আদিত্যায বিদ্মহে সহস্রকিরণায
ধীমহি . তানঃ সূর্যঃ প্রচোদযাত্ .
সবিতা পশ্চাত্তাত্সবিতা
পুরস্তাত্সবিতোত্তরাত্তাত্সবিতাধরাত্তাত্ .
সবিতা নঃ সুবতু সর্বতাতিং সবিতা নো রাসতাং দীর্ঘমাযুঃ .
৐ইত্যেকাক্ষরং ব্রহ্ম . ঘৃণিরিতি দ্বে অক্ষরে . সূর্য
ইত্যক্ষরদ্বযম্ . আদিত্য ইতি ত্রীণ্যক্ষরাণি .
এতস্যৈব সূর্যস্যাষ্টাক্ষরো মনুঃ . যঃ সদাহরহর্জপতি স
বৈ ব্রাহ্মণো ভবতি স বৈ ব্রাহ্মণো ভবতি .
সূর্যাভিমুখো জপ্ত্বা মহাব্যাধিভযাত্প্রমুচ্যতে .
অলক্ষ্মীর্নশ্যতি . অভক্ষ্যভক্ষণাত্পূতো ভবতি .
অগম্যাগমনাত্পূতো ভবতি . পতিতসম্ভাষণাত্পূতো ভবতি .
অসত্সম্ভাষণাত্পূতো ভবতি .
মধ্যাহ্নে সূরাভিমুখঃ পঠেত্ .
সদ্যোত্পন্নপঞ্চমহাপাতকাত্প্রমুচ্যতে .
সৈষাং সাবিত্রীং বিদ্যাং ন কিঞ্চিদপি ন
কস্মৈচিত্প্রশংসযেত্ .
য এতাং মহাভাগঃ প্রাতঃ পঠতি স ভাগ্যবাঞ্জাযতে .
পশূন্বিন্দতি . বেদার্থং লভতে .
ত্রিকালমেতজ্জপ্ত্বা ক্রতুশতফলমবাপ্নোতি . যো হস্তাদিত্যে
জপতি স মহামৃত্যুং তরতি য এবং বেদ ..
ইত্যুপনিষত্ ..
হরিঃ ॐ ভদ্রং কর্ণেভিরিতি শান্তিঃ ..
ইতি সূর্যোপনিষত্সমাপ্তা ..